سعودي عربستان د بدلون پر لور

نورالباري مل

July 31, 2022

د سعودي عربستان وروستۍ پرمختيايي پلانونو ته حتی غرب لا ګوته په غاښ دی. که له يوې خوا د ولیعهد محمد بن سلمان له واکمنېدو سره سم په سعودي عربستان کې انساني خپلواکي، د بيان ازادي، او د نومهالې نړۍ نور ارزښتونه د غوړېدا په حال کې دي نو له بلې خوا د ټيکنالوجۍ، مډرنيزم او صنعتي پرمختګ هم په کش کې دی. په دې وروستيو کې د سعودي عربستان د لاين په نوم د نوي ښار جوړولو په غربي رسنيو کې ډنډوره جوړه کړې ده. The Line د تمدن او ساختماني انقلاب شاهکار دی. دلته د يوې سيده کرښې په بڼه يو نوی ښار ابادېږي. دا ښار به د نهه ميلونه وګړو د ځايولو ظرفيت ولري.

نهه ميلونه وګړي خورا ډېر دي.

د نارسمي شمېرو له مخې د کابل نفوس شاوخوا څلور ميلونه دی. مانا دا چې په دې ښار کې د کابل نفوس دوه واره ځايېږي. خو جالبه دا ده چې دلته به د کابل غوندې د موټرانو ګڼه ګوڼه او د لارو بندېدل نه وي. ځکه په دې ټول ښار کې به يو موټر هم نه وي. او پر وړو وړو بلاکونو به وېشل شوی وي چې هر بلاک خپل پلورنځي، خوړنځي، ښوونځي، روغتونونه او د ورځني ژوند د اړتيا وړ نور ځايونه ولري. او دې ټولو ځايونو ته به تر پېنځه دقيقې لږ پلي واټن وي.

د دې ښار جګوالی به ۵۰۰ متره دی. پراخوالی ۲۰۰ متره، او له يوه سره تر بله سره اوږدوالی ۱۷۰ کيلومتره دی. په دې ښار کې به بې پلوټه/بې موټروان، يا بې چلوونکي ميټرو چلېږي او په هرو شلو دقيقو کې به له يوه سره تر بله سره رسېږي. دا ښار دی لاين يا کرښه نومېږي. کرښه به له دواړو لورو په ښيښه‌يي دېوالونو پوښلې وي. د دې ښار پر جوړولو شاوخوا يو ټريليون ډالر لګښت راځي.

دا ښا د محمد بن سلمان د نوي شرکت نيوم لخوا جوړېږي. نيوم د لاتيني ژبې د "نيو" او د انګليسي الفبا د M تورې څخه رغېدلی نوم دی چې د لاتيني ژبې "نيو" د نوي په مانا دی او M دلته د مستقبل په مانا دی. "نيوم" يانې نوی مستقبل. 

لاين يا کرښه يې يوازې پيلامه ده. دې ته ورته نور ښارونه هم په پلان کې دي چې سر له اوسه يې څېړنېزي او ودانيزې چارې رواني دي. له دې ډلې څخه بل ښار اکسګان دی. اکسيګان بيا فقط صنعتي ښار او بندرګاه ده.

دې ته ورته بل موډرن ښار د ټروجينا په نوم جوړېږي. ټروجينا بيا تفريحي ښار دی چې د نړۍ له ګوټ ګوټه به سيلانيان ورته را مات وي. 

د لاين، اکسګان او ټروجينا څخه که درې پېغامونه واخلو نو دا به وي چې لومړي سعودي عربستان غواړي له معاصرې نړۍ سره اوږه پر اوږه ولاړ شي او د اقليمي بدلون په کرارولو کې نه يوازې ونډه واخلي بلکې سرلاری يې شي. ځکه لاين ښار موټرونه نه کاروي او درګرده بياکارېدونکې انرژي Renewable Energy کاروي. 

دويم، د اکسيګان له لارې سعودي عربستان غواړي له نړۍ سره تجارتي اړيکې وغځوي او صنعتکاران دعوت کړي چې د دوی له اسانتياوو ګټه واخلي، اکسيګان به په ورته وخت کې هم صنعتي ښار او هم بندرګاه وي چې د اموالاو په لېږد را لېږد کې به خورا اساني او چټکتيا رامنځته کړي.

درېيم، د ټروجنيا ښار نړيوالو ته دا پېغام ورکوي چې سعودي عربستان ته هم د غرب په شمول له نورې نړۍ سيلانيان راتلای شي او په خلاصه پښه ګرځېدلای او ساتېری کولای شي.